उरण-नेरूळ वाढीव फेऱ्यांचा रेल्वेमंत्र्यांच्या हस्ते शुभारंभ

पनवेल, ता. ८ (बातमीदार) ः उरण-नेरूळ रेल्वेमार्गावरील लोकल फेऱ्यांत वाढ करण्याचा महत्त्वपूर्ण निर्णय केंद्रीय रेल्वे मंत्रालयाने घेतला आहे. आचारसंहिता संपल्यानंतर सकाळी ६.०५ वाजता पहिली सुधारित लोकल धावणार असून, नव्या लोकलचा औपचारिक शुभारंभ केंद्रीय रेल्वे मंत्री अश्विनी वैष्णव यांच्या हस्ते होणार आहे, अशी माहिती आमदार महेश बालदी यांनी दिली.
फेऱ्यांच्या वाढीमुळे उरण, जासई, खारकोपर, गव्हाण आणि नेरूळ परिसरातील प्रवाशांना मोठा दिलासा मिळणार आहे. हा मार्ग दररोज प्रवास करणाऱ्या नागरिकांसाठी अत्यंत महत्त्वाचा आहे. उरण-नेरूळ मार्गावर फेऱ्यांत वाढ होणे हा उरण व आसपासच्या परिसराच्या विकासासाठी एक महत्त्वाचा टप्पा ठरेल आणि दैनंदिन प्रवास अधिक वेगवान, सुरक्षित आणि सोईस्कर बनेल, असा विश्वास आमदार महेश बालदी यांनी व्यक्त केला. या निर्णयाबद्दल बालदी यांनी केंद्रीय रेल्वेमंत्री अश्विनी वैष्णव यांची भेट घेऊन त्यांचे मनःपूर्वक आभार मानले. बालदी यांनी गेल्या काही महिन्यांपासून उरण-नेरूळ मार्गावरील गाड्यांची संख्या वाढविण्यासाठी सातत्यपूर्ण पाठपुरावा केला होता. त्यानंतर रेल्वे मंत्रालयाने नव्या लोकल फेऱ्यांना हिरवा कंदील दाखवला असून, या वाढीव फेऱ्या नववर्षाच्या प्रारंभी सुरू होणार आहेत, असेही सांगण्यात आले.