पूर्व वैमनस्यातून व्यावसायिकावर हल्ला
अंबरनाथ, ता. ८ (वार्ताहर) : जुन्या वादाचा राग मनात धरून एका व्यावसायिकावर करण्यात आलेल्या हल्ल्याची धक्कादायक घटना अंबरनाथमध्ये घडली. याप्रकरणी शिवाजीनगर पोलिस ठाण्यात गुन्हा दाखल करण्यात आला असून, आरोपी सध्या फरार आहेत. पोलिसांनी त्यांचा शोध सुरू केला आहे.
जखमी नितीन विष्णू वायले (वय ३२, रा. गायकवाड पाडा, अंबरनाथ पूर्व) यांनी दिलेल्या माहितीनुसार, ६ डिसेंबरला रात्री १.३० वाजता ते काही कामानिमित्त उल्हासनगर-५ मधील गायकवाड पाड्यातील गणेश चौघुले यांच्या शिवसेना शाखेसमोर आले होते. त्याच वेळी प्रणय निकम हा आणखी तीन अनोळखी मित्रांसह तेथे होता. जुन्या वैमनस्यातून प्रणयने आपल्या तीन साथीदारांच्या मदतीने फिर्यादीला शिवीगाळ केली आणि त्यानंतर दांडक्याने; तसेच लाथाबुक्क्यांनी मारहाण केली, असे वायले यांनी पोलिसांना सांगितले. अचानक झालेल्या या हल्ल्यात त्यांना दुखापत झाली असून त्यांनी तत्काळ तक्रार नोंदवली. घटनेनंतर आरोपी पळून गेले असून त्यांच्याविरुद्ध शिवाजीनगर पोलिस ठाण्यात गुन्हा दाखल करण्यात आला आहे. पुढील तपास पोलिस करत आहेत.