अभिनेता-दिग्दर्शक बबन जोशी यांचे निधन

मुंबई, ता. ८ : रंगभूमीसह मालिका व चित्रपटांमध्ये काम करणारे अभिनेते व दिग्दर्शक बबन जोशी यांचे रविवारी (ता. ७) रात्री निधन झाले. ते ५८ वर्षांचे होते. त्यांच्या पार्थिवावर सोमवारी (ता. ८) दुपारी कामाठीपुरा येथे अंत्यसंस्कार करण्यात आले. त्यांच्या पश्चात पत्नी आणि दोन मुली आहेत. जोशी यांनी अनेक नाटकं, मालिका आणि लघुपटांमध्ये काम केले. स्वतःच्या ‘अनमोल चित्र प्रॉडक्शन’ या बॅनरखाली त्यांनी अनेक लघुपटांचे लेखन, दिग्दर्शन आणि अभिनय केला होता. ‘योगा योग’, तसेच ‘हरवलेलं उत्तर’ या नाटकाचे लेखक-दिग्दर्शक म्हणून त्यांना विशेष ओळख मिळाली. त्यांनी दिग्दर्शित केलेल्या ‘जल बीन’ या लघुपटाला ‘आर्यारवी एन्टरटेन्मेंट पुरस्कार’ मिळाला होता. कलाक्षेत्रात झोकून देत महापालिकेच्या नोकरीसोबत त्यांनी आपली कला जपली. त्यांना जनहित फाउंडेशनतर्फे उत्कृष्ट कलाकार हा पुरस्कारसुद्धा मिळाला होता. मूळचे कोकणातील मुळशी तालुक्यातील ओशिवळा गावचे असलेल्या बबन जोशी यांच्या निधनामुळे कला क्षेत्रात शोककळा पसरली आहे.