प्रदूषण मुक्तीत अडथळे
खारघरमधील चार्जिंग स्टेशन धूळखात
खारघर, ता. १० (बातमीदार) : वाढते प्रदूषण कमी करण्याच्या उद्देशाने राज्यात इलेक्ट्रिक वाहन धोरण जाहीर केले आहे. याच अनुषंगाने सेक्टर दोनमधील उपस्टेशनमध्ये पाच वर्षांपूर्वी उभारलेले चार्जिंग स्टेशन एजन्सीच्या दुर्लक्षामुळे धूळखात पडले आहे.
पेट्रोल, डिझेलच्या वाढणाऱ्या किमतींबरोबर वायू प्रदूषणाला पर्याय म्हणून इलेक्ट्रिक वाहनांकडे नागरिकांचा कल आहे. याच अनुषंगाने खारघर सेक्टर दोनमधील महावितरणच्या उपकेंद्रामध्ये पाच वर्षांपूर्वी चार्जिंग स्टेशन उभारण्यात आले होते. यासाठी एजन्सीदेखील नेमण्यात आली होती. सायन-पनवेल महामार्गावरून धावणाऱ्या इलेक्ट्रिक वाहनांसाठी सुविधा उपयुक्त आहे; मात्र केंद्र बंद असल्याने चालक नाराज आहेत. यासंदर्भात खारघर महावितरण कार्यालयाचे अतिरिक्त कार्यकारी अभियंता व्यंकटेश कासल यांनी महावितरणकडून वीजपुरवठा सुरू असल्याचे सांगितले.