मोकळ्या भूखंडांवर उंदरांचे राज्य
सिडकोच्या वसाहतीमधील रहिवासी हैराण
खारघर, ता. १० (बातमीदार) : वसाहतीमधील सिडकोच्या मोकळ्या भूखंडांवर अतिक्रमणे केली आहेत. अनेकांनी सिमेंट, खडी, गॅरेज, भंगार व्यवसाय थाटले आहेत. या साहित्यांमुळे उंदरांचा उपद्रव वाढल्याने रहिवासी हैराण आहेत.
खारघर शहर विकसित करताना सिडकोने बहुतांश सेक्टरमध्ये भूखंड राखीव ठेवले आहेत. काही भूखंडावर सिडकोने फलक लावले आहेत. काहींनी फलक हटवून भूखंडावर रेती, सिमेंट, खडी विक्री व्यवसाय तर काहींनी गॅरेज, भंगारचे व्यवसाय थाटले आहेत. मोकळ्या भूखंडावर वाढलेल्या झाडाझुडपांमुळे उंदरांचा वावर वाढला आहे. तसेच अस्वच्छतेमुळे डासांचा प्रादुर्भाव वाढल्याने रोगराईची भीती आहे. विशेष म्हणजे, सिडकोच्या भूखंडावर भंगारमाफियांनी अतिक्रमण करून खुलेआम व्यवसाय थाटले आहेत; मात्र अतिक्रमण करणाऱ्यांकडे दुर्लक्ष होत असल्याने नागरिक आश्चर्य व्यक्त करीत आहे. यासंदर्भात मुख्य दक्षता अधिकारी सुरेश मेंगडे यांच्याशी संपर्क झाला नाही.