भिवंडी, ता. १० (वार्ताहर) : शहरात अमली पदार्थ व गुटखाविक्री खुलेआम सुरू असल्याची गंभीर बाब राज्य विधानसभेच्या नागपूर येथील हिवाळी अधिवेशनात मंगळवारी उपस्थित करण्यात आली. आमदार रईस शेख यांनी भिवंडी शहर गुटखा तस्करीचे हब बनत असल्याचा आरोप करत तातडीच्या कारवाईची मागणी सरकारकडे केली.
भिवंडीत गोदाम व्यवसाय मोठ्या प्रमाणावर फोफावला आहे. त्याला पूरक असलेला वाहतूक व्यवसायही व्यापक आहे. या व्यवस्थेचा गैरफायदा घेत गुजरातमधून येणारा गुटखा भिवंडीमार्गे राज्यभर वितरित केला जात असल्याची माहिती सभागृहात देण्यात आली. गुटखा वाहतूक व्यवस्था उद्ध्वस्त केल्याशिवाय तस्करी थांबणार नाही, असे आमदार शेख यांनी स्पष्ट केले. पोगाव येथे अलीकडेच एक गुटखा फॅक्टरी आढळली होती; मात्र आरोपी जामिनावर सुटल्याने कारवाईची भीती उरली नसल्याचेही शेख यांनी सांगितले. गुटखामाफियांवर प्रभावी कारवाई व्हावी यासाठी राज्य सरकारने टास्क फोर्स स्थापन करावी, अशी मागणी त्यांनी सभागृहात केली.

गुटखामाफियांना मोक्का लागणार?
सध्याचे कायदे कमकुवत असल्याने गुटखा तस्करांना सहज जामीन मिळतो, याची दखल घेत मुख्यमंत्र्यांनी गुटखाबंदी अधिक कडक करण्याचा मानस जाहीर केला. गुटखामाफियांवर मोक्कांतर्गत कारवाई करण्याचा प्रस्ताव विचाराधीन असून, भिवंडीत गुप्त माहितीच्या आधारे विशेष मोहीम राबविण्यात येईल, असेही मुख्यमंत्र्यांनी शेख यांच्या प्रश्नाला उत्तर देताना सांगितले.