मुंबई शहराच्या खेळाडूंची दमदार कामगिरी
राज्यस्तरीय शालेय किकबॉक्सिंग स्पर्धेत सहा पदकांची कमाई

शिवडी, ता. १० (बातमीदार) : गोंदिया आमगाव येथे झालेल्या राज्यस्तरीय शालेय किकबॉक्सिंग स्पर्धेत मुंबई विभागाचे प्रतिनिधित्व करताना स्पोर्ट्स किकबॉक्सिंग असोसिएशन मुंबई शहरच्या खेळाडूंनी लाइट कॉन्टॅक्ट या प्रकारात दोन सुवर्ण, तीन रौप्य आणि एक कांस्यपदकांची कमाई केली.
१७ वर्षांखालील मुलींच्या ५५ किलो वजनी गटात एम. डी. कॉलेज, परेलच्या दुर्वा मिथुन गावडेने, तर १९ वर्षांखालील मुलांच्या ७० किलो वजनी गटात एम. डी.च्याच प्रज्ञेश मिलिंद पटवर्धन याने सुवर्णपदक जिंकण्याची कामगिरी केली. १४ वर्षांखालील मुलांच्या ३८ किलो वजनी गटात श्री वल्लभ आश्रम स्कूल, सायनचा श्रेयांक मौर्या, ६३ किलो पेक्षा जास्त वजनी गटात व्ही. एन. सुळे हायस्कूल, दादरचा पार्थ कदम, तसेच १७ वर्षांखालील मुलांच्या ५५ किलो गटात जय हिंद कॉलेजचा यथार्थ बुडामाला यांनी रौप्य कमाई केली.
कांस्यपदक विजेत्यांमध्ये १४ वर्षांखालील मुलांच्या ३२ किलो वजनी गटात व्ही. एन. सुळे हायस्कूल, दादरचा ग्रिशम पटवर्धनने कांस्यपदाकावर मोहर उमटवली.
या खेळाडूंना प्रशिक्षक उमेश मुरकर, विघ्नेश मुरकर, विन्स पाटील, आशिष महाडिक, अलोक ब्रीद आणि आफताब खान यांचे मार्गदर्शन लाभले.