छत्रपती संभाजीनगर ः ओबीसी प्रवर्गातील वंचित (बलुतेदार, अलुतेदार) मागास ओबीसी समाजाला सामाजिक न्याय मिळवून देण्यासाठी ओबीसी आरक्षणाची श्वेतपत्रिका काढा, अशी मागणी वंचित ओबीसी संघर्ष समितीने गुरुवारी (ता. चार) विभागीय आयुक्तांना दिलेल्या निवेदनात केली.

वंचित ओबीसी समाजातील घटकांचा थेट एसटी प्रवर्गात समावेश करावा, ओबीसी आरक्षणाची श्वेतपत्रिका काढून बिंदुनामावलीची चौकशी करावी, वंचित ओबीसी समाजातील घटकांना शिक्षण व नोकरीत विशेष हक्क व सवलती लागू कराव्यात, या घटकांसाठी विशेष उपवर्ग तयार करावा, तसेच सक्षम आर्थिक विकास महामंडळ स्थापन करावे, त्यासाठी किमान ५०० कोटी रुपयांची तरतूद करावी, लाभार्थींना १५ लाख रुपयांचे बिनव्याजी कर्ज उपलब्ध करून द्यावे आदी मागण्यांचा निवेदनात समावेश आहे.