खेळाच्या मैदानात २,२०० खेळाडू
आदिवासी विकास प्रकल्पस्तरीय क्रीडा महोत्सव सुरू
तलासरी, ता. ११ (बातमीदार) ः आदिवासी विकास विभागांतर्गत डहाणू, तलासरी प्रकल्पस्तरीय क्रीडा स्पर्धेचा शुभारंभ सवणे येथे उत्साहात झाला. यंदाच्या क्रीडा महोत्सवात तब्बल २,२०० खेळाडूंनी सहभाग घेतला असून आदिवासी कला, संस्कृतीचा अनोखा संगम अनुभवता येणार आहे.
आदिवासी मुला-मुलींच्या स्पर्धात्मकता, शिस्त, नेतृत्वगुण, संघभावना आणि आरोग्यदायी जीवनशैली विकसित करण्याच्या दृष्टीने हा क्रीडामहोत्सव महत्त्वपूर्ण ठरणार आहे. आदिवासी मुलांना खेळ, स्वास्थ्य, संस्कार करणे हा या उपक्रमाचा मुख्य हेतू आहे. खेळाडूंसाठी निवास, भोजन, आरोग्य सुविधा, वाहतूक, तसेच मैदान व्यवस्थापनाची उत्कृष्ट आखणी करण्यात आली आहे. स्पर्धा १४, १७ आणि १९ वर्षे या तीन वयोगटांमध्ये होत असून ९ ते ११ डिसेंबर या तीन दिवसांत विविध गटांच्या क्रीडा प्रकारांचा थरार रंगणार आहे. या कार्यक्रमास डहाणू एकात्मिक आदिवासी विकास प्रकल्पाचे योगेश खंदारे, कार्यालयीन अधीक्षक जगदीश पाटील, संशोधन अधिकारी यदुनाथ भोये, निरीक्षक अमोल अहिरे, श्रीराम आंधळे आदी उपस्थित होते.