लाच स्वीकारताना लिपिकाला अटक
भाईंदर, ता. ११ (बातमीदार) : काशीमिरातील पत्र्याच्या घरावरील कारवाई टाळण्यासाठी १६ हजारांची लाच स्वीकारताना मिरा-भाईंदर महापालिकेच्या लिपिकासह तिघांवर लाचलुचपत प्रतिबंधक विभागाने अटक केली आहे. काजूपाडा भागातील पत्र्याच्या घरावर कारवाईसाठी महापालिकेच्या प्रभाग सहामधील लिपिक राजेश कदम, सुहास केणी यांनी २५ हजारांची मागणी केली होती. तडजोडीनंतर १६ हजार देण्याचे ठरले होते. याबाबतची तक्रार ठाणे लाचलुचपत प्रतिबंधक विभागाकडे करण्यात आली होती. त्यानुसार बुधवारी (ता. १०) सायंकाळी सापळा रचण्यात आला. या वेळी सुहास संजय साव या व्यक्तीला पैसे स्वीकारताना रंगेहाथ पकडण्यात आले. राजेश कदम याच्याविरोधात यापूर्वीही प्रशासनाकडे अनेक तक्रारी दाखल करण्यात आल्या होत्या. तसेच मध्यंतरी कदम याच्या बदलीचे आदेश आले होते; मात्र अचानक हा आदेश रद्द करण्यात आला होता.