टोकावडे, ता. १३ (बातमीदार) : मुरबाड तालुक्यातील म्हसा येथे श्री खंबालिंगेश्वर मंदिर सभागृहात पंतप्रधान मोफत उज्ज्वला गॅस वितरण शिबिर उत्साहात पार पडले. भालचंद्र कुर्ले, ग्रामस्थ मंडळ यांच्या संयुक्त विद्यमाने शिबिर झाले. सरकारच्या विविध योजनांचा लाभ अनेकदा शेवटच्या घटकापर्यंत पोहोचत नसल्याची खंत लक्षात घेऊन, महिलांना कोणतीही गैरसोय होऊ नये तसेच धावपळ न करता योजना मिळावी, या उद्देशाने शिबिर घेण्यात आले.
ओम नमः शिवाय इंडेन ग्रामीण वितरक, नारिवली यांच्या सहकार्याने झालेल्या शिबिरात मोठ्या संख्येने महिलांनी सहभाग घेतला. महिलांना पंतप्रधान उज्ज्वला गॅस योजनेची सविस्तर माहिती देत आवश्यक मार्गदर्शन केले. डॉ. बाबासाहेब आंबेडकर यांच्या ६९व्या महापरिनिर्वाण दिनानिमित्त भालचंद्र कुर्ले यांच्या हस्ते शेकडो महिलांना उज्ज्वला गॅसजोडणीचे वाटप केले. घराघरांत स्वच्छ इंधनाची ज्योत प्रज्वलित व्हावी आणि महिलांचे आरोग्य सुरक्षित राहावे, या उद्देशाने राबविण्यात आलेला हा उपक्रम महिलांसाठी दिलासादायक ठरला. कार्यक्रमाला म्हसा ग्रामपंचायतीच्या सरपंच जया घागस, कान्होळच्या सरपंच रेश्मा घरत, परशुराम भोईर, कचरू म्हारसे, जीवन कुर्ले, माजी ग्रामपंचायत सदस्य काळुराम शिंदे, ग्रामपंचायत सदस्य गजानन घागस, ह.भ.प. मंगल महाराज गायकर यांच्यासह शेकडो महिला मोठ्या संख्येने उपस्थित होत्या.