भोपर टेकडीचा कायापालट
२.१३ कोटींच्या निधीतून पर्यटनस्थळाचा विकास
सकाळ वृत्तसेवा
डोंबिवली, ता. १५ ः निसर्गसंपन्नतेमुळे आणि पक्षीनिरीक्षणासाठी प्रसिद्ध असलेली भोपर टेकडी आता नव्या स्वरूपात पर्यटकांच्या भेटीला येणार आहे. कल्याण-डोंबिवली महानगरपालिकेकडून भोपर गावदेवी मंदिर टेकडी परिसराच्या सुशोभीकरणासाठी दोन कोटी १३ लाख ४३ हजार ८८१ रुपयांचा निधी मंजूर करण्यात आला आहे. या कामामुळे भोपर टेकडीचा सर्वांगीण विकास होणार आहे.
भोपर टेकडी हे डोंबिवली परिसरातील महत्त्वाचे पर्यटन आकर्षण केंद्र असून, येथे दरवर्षी पक्षी पाहण्यासाठी व निसर्गाचा आनंद घेण्यासाठी दूरदूरून पर्यटक येतात. मात्र, पुरेशा सुविधा, सुरक्षितता आणि देखभालीअभावी या ठिकाणाचा विकास अपेक्षित पातळीवर होऊ शकला नव्हता. या टेकडीच्या सुशोभिकरणासाठी भाजप आमदार रविंद्र चव्हाण यांच्या प्रयत्नातून निधी मंजूर झाला असून माजी नगरसेविका रविना माळी यासाठी सातत्याने पाठपुरावा करत असल्याची माहिती संदीप माळी यांनी दिली. पालिका आयुक्त अभिनव गोयल आणि अधिकाऱ्यांनी या टेकडीची नुकतीच पाहणी करत कामाचा आढावा घेतला आहे. निधी मंजूर होऊन निविदा प्रक्रिया राबविली गेली असून लवकरच या कामाची सुरुवात करण्यात येणार असल्याचे देखील त्यांनी सांगितले.

‘या’ सुविधा देणार
या निधीतून पक्षी निरिक्षणासाठी येणाऱ्या पर्यटकांना योग्य त्या सोयी-सुविधा, पक्ष्यांसाठी विविध प्रकारच्या झाडांची लागवड,
टेकडी परिसराचे सुशोभीकरण, पायवाटा, संरक्षक कठडे, प्रकाशव्यवस्था, स्वच्छता सुविधा उपलब्ध करून देण्यात येणार आहेत. याशिवाय बास्केटबॉल खेळाडूंसाठी बास्केट कोर्ट, लहान मुलांसाठी आकर्षक बगीचा तयार करण्यात येणार आहे.

पर्यटनाला चालना
भोपर टेकडीच्या विकासामुळे परिसरातील पर्यटनाला चालना मिळणार असून, स्थानिक रोजगाराच्या संधीही निर्माण होण्याची शक्यता आहे. निसर्ग संवर्धनासोबतच सुरक्षित व सुसज्ज पर्यटनस्थळ निर्माण करण्याच्या दृष्टीने हे काम महत्त्वाचे ठरणार आहे. भोपर टेकडीच्या कायापालटामुळे डोंबिवलीला एक नवे, पर्यावरणपूरक आणि आकर्षक पर्यटन केंद्र मिळणार असल्याची अपेक्षा व्यक्त केली जात आहे.

उद्यानांचेही रुपडे पालटणार
कल्याण-डोंबिवली महापालिका हद्दीत लहान-मोठी मिळून सुमारे ६५ उद्याने आणि १७ मैदाने नागरिकांसाठी उपलब्ध आहेत. सुमारे २० लाख लोकसंख्या असलेल्या पालिका क्षेत्रातील विरंगुळ्याचे मोठे केंद्र असलेल्या उद्यानांची संख्या वाढविणे गरजेचे आहे. या दृष्टीकोनातून तत्कालीन आयुक्त डॉ. इंदुराणी जाखड यांनी पालिकेच्या अंदाजपत्रकात पुरेशी तरतूद करुन ठेवली होती. २०२३ च्या शहर सौंदर्यीकरण उपक्रमात पालिकेला १० कोटींचे पारितोषिक प्राप्त झाले होते. यातूनच शहरातील उद्यानांचा कायापालट करण्यात येत आहे.