कळवावासीयांना ‘संगीत उद्यानाची’ भेट
कलाकारांना मिळाले हक्काचे व्यासपीठ; ठाणे महापालिका क्षेत्रातील पहिला प्रयोग
सकाळ वृत्तसेवा, ठाणे
ठाणे, ता. १५ : कळवा येथील कलाप्रेमी नागरिक आणि कलाकारांसाठी एक महत्त्वपूर्ण सुविधा उपलब्ध झाली आहे. ‘आर्ट गॅलरी, स्टँडअप कॉमेडी, नृत्य सराव, अभिनय, पथनाट्य सराव आणि संगीताची मैफल’ अशा विविध कलाविष्कारांना उत्तम व्यासपीठ मिळावे, यासाठी कळव्यात संगीत उद्यान उभारले आहे. ठाणे महापालिका क्षेत्रातील अशा प्रकारचे हे पहिले उद्यान आहे.

माजी नगरसेविका प्रमिला केणी यांच्या प्रयत्नातून हे उद्यान साकारण्यात आले आहे. उपमुख्यमंत्री एकनाथ शिंदे आणि खासदार डॉ. श्रीकांत शिंदे यांच्या मार्गदर्शनाखाली याची निर्मिती करण्यात आली. रविवारी या उद्यानाचे लोकार्पण बाल संगीतप्रेमींच्या हस्ते झाले. कळव्यात अनेक कलाकार आहेत, परंतु त्यांना सराव किंवा आपली कला सादर करण्यासाठी हक्काचे व्यासपीठ नव्हते. किणी परिवाराने यासाठी ठाणे महापालिकेकडे पाठपुरावा करून हे उद्यान कळवेकरांच्या सेवेत आणले आहे. संगीतप्रेमी सकाळी १० ते रात्री १० वाजेपर्यंत येथे येऊन सराव किंवा आपली कला सादर करू शकणार आहेत.

कला सादरीकरणासाठी व्यासपीठ
हे संगीत उद्यान गायन, आर्ट गॅलरी, चित्रप्रदर्शन, स्टँडअप कॉमेडी, नृत्य सराव, अभिनय, पथनाट्य सराव आदी कलांसाठी एक उत्तम व्यासपीठ ठरणार आहे. संगीतप्रेमींना येथे आपल्या कला गुणांना वाव देता येणार असून, सरावाची संधीही उपलब्ध आहे.

इतर सुविधा
उद्यानात कला सादर करण्यासोबतच इतर सुविधांची आणि सुरक्षिततेचीही काळजी घेण्यात आली आहे. दोन ठिकाणी अ‍ॅम्पी थिएटर आणि योगासाठी जागा उपलब्ध करण्यात आली आहे. ज्येष्ठ नागरिकांसाठी व्यायाम साहित्यदेखील उपलब्ध करून देण्यात आले आहे. सुरक्षेसाठी दोन सुरक्षा रक्षक उपलब्ध असणार आहेत. याशिवाय, संपूर्ण परिसरात सीसीटीव्ही कॅमेरे बसविण्यात आले आहेत. मंदार केणी यांनी संगीतप्रेमींना या उद्यानाचा लाभ घेण्याचे आवाहन केले आहे.