२२० जणांचे रक्तदान
आंबेसरीत संत निरंकारी चॅरिटेबल फाउंडेशनतर्फे शिबिर

कासा, ता. १६ (बातमीदार) : संत निरंकारी चॅरिटेबल फाउंडेशनच्या वतीने संत निरंकारी सत्संग भवन, आंबेसरी येथे रक्तदान शिबिर पार पडले. ‘जनसेवा हीच ईश्वर सेवा’ या भावनेतून राबविण्यात आलेल्या या उपक्रमाला ग्रामीण भागातून उत्स्फूर्त प्रतिसाद मिळाला. २२० जणांनी या वेळी रक्तदान केले.
शिबिराचे उद्‌घाटन आमदार कॉ. विनोद निकोले यांच्या हस्ते करण्यात आले. या वेळी सरपंच गीता, शिबिराचे संयोजक रामजी खांनजोडे यांच्यासह विविध शाखांचे पदाधिकारी व सेवाभावी कार्यकर्ते मोठ्या संख्येने उपस्थित होते.
शिबिरात आंबेसरी शाखेचे दिलीप हाडळ, वेवजी शाखेचे काशिनाथ डोल्हारे, हळदपाडा शाखेचे सुभाष हांडवा यांच्या नेतृत्वाखाली तीनही शाखांनी सक्रिय सहभाग नोंदवला. रक्तसंकलनासाठी वलसाड येथील पथक आणि इंडियन रेड क्रॉस सोसायटी, सिल्वासा यांच्या दोन स्वतंत्र वैद्यकीय पथकांची नियुक्ती करण्यात आली होती. या वेळी एकूण ३१६ जणांनी रक्तदानासाठी अर्ज भरले होते. त्यापैकी २२० जणांनी रक्तदान केले. वैद्यकीय कारणांमुळे ९६ अर्ज नाकारण्यात आले.