धारावीतील प्रेमनगर नाला तुडुंब
आजारांचे प्रमाण वाढले
धारावी, ता. १६ (बातमीदार) : धारावीतील प्रेमनगर येथील मुख्य नाला सध्या गाळ व कचऱ्याने तुडुंब भरला आहे. त्‍यामुळे वस्तीत दुर्गंधी निर्माण झाली आहे. अनेक आजारांचा प्रादुर्भाव वाढला आहे. पावसाळ्यात नालेसफाई करण्यात आली होती. त्यानंतर नाल्याकडे पालिकेचे दुर्लक्ष झालेले आहे. पालिकेच्या कारभाराविरोधात स्थानिक रहिवासी संताप व्यक्त करत आहेत.
धारावीतील मुख्य नाल्यांपैकी एक असलेल्या नाल्याच्या बाजूला रहिवासी वसाहत व अनेक गोदामे आहेत. गोदामातील कचरा मोठ्या प्रमाणात नाल्यात फेकला जातो. त्‍यामुळे नाल्यातील पाण्याचा प्रवाह अडला आहे. त्यातच जलपर्णी वाढत असल्याने पाण्याचा प्रवाह बंद झाला आहे. याचा फटका येथील रहिवाशांना सहन करावा लागत आहे.
वर्षातून एकदाच पावसाळ्यात नाल्यांची सफाई पालिकेतर्फे केली जाते. त्यानंतर नाल्यांच्या सफाईकडे पहिले जात नाही. प्रेमनगर नाल्यात नाईकनगर, शताब्दीनगर, प्रेमनगर आदी वस्त्यांमधील सांडपाणी सोडले जाते. पुढे हा नाला मिठी नदीत विसर्जित होतो. एकीकडे मिठी नदी सफाई करण्यावरून गेल्‍या अनेक वर्षांपासून प्रयत्न केले जात आहेत. त्याच मिठी नदीत हे सांडपाणी जात असल्याने नदीला प्रदूषित नाल्याचे स्वरूप आले आहे. नालेसफाईसंदर्भात पालिका प्रशासन गंभीर नसल्याचा आरोप करण्यात येत आहे.

पालिकेने लक्ष द्यावे!
प्रेमनगर येथे शेकडो कुटुंबे वास्तव्यास आहेत. या कुटुंबातील सदस्यांना नाल्याच्या प्रदूषणाचा मोठा त्रास सहन करावा लागत आहे. पालिकेने तातडीने नाल्याच्या सफाईबाबत पावले उचलावीत, अशी मागणी येथील रहिवाशांनी केली आहे.