शिरवणे मार्गावरील गतिरोधक तुटल्याने अपघाताचा धोका
जुईनगर, ता. १६ (बातमीदार): जुईनगर येथील सेक्टर २४ मधील स्वयंभू गणेश मंदिर समोरील रस्त्यावरील गतिरोधक तुटल्याने अपघाताचा धोका वाढला आहे. या मार्गावरून नेरूळ व जुईनगर परिसरातून सेक्टर १ शिरवणे तसेच आजूबाजूच्या लघुउद्योग भागात जाणाऱ्या वाहनांची मोठी वर्दळ असते.
याच रस्त्यावरून जुईनगर कॉन्व्हेंट, अमृता विद्यालय तसेच पूर्व भागातील सेंट झेविअर्स स्कूल आणि सेंट अगस्तीन स्कूल येथे जाणाऱ्या विद्यार्थ्यांची व पालकांची नियमित ये-जा सुरू असते. रस्ता अरुंद असून दुतर्फा वाहने उभी केली जात असल्याने अनेकदा येथे वाहतूक कोंडीही होते.
अशा परिस्थितीत गतिरोधक तुटल्याने वाहने भरधाव वेगाने धावत असल्याचे दिसून येत आहे. या परिसरात मंदिर, शाळा, उद्यान तसेच ज्येष्ठ नागरिकांचे विरंगुळा केंद्र असल्याने दिवसरात्र नागरिकांची वर्दळ असते. त्यामुळे येथे गतिरोधक असणे अत्यंत आवश्यक असल्याचे स्थानिक नागरिकांचे म्हणणे आहे.
गेल्या अनेक दिवसांपासून गतिरोधक दुरुस्त न झाल्याने अपघात होण्याची शक्यता अधिक वाढली आहे. त्यामुळे संबंधित प्रशासनाने तातडीने या ठिकाणचा गतिरोधक दुरुस्त करावा अथवा नवीन गतिरोधक उभारावा, अशी जोरदार मागणी नागरिकांकडून करण्यात येत आहे.