सानपाडा विभागातील भुयारी मार्गाचे भूमिपूजन
नेरूळ, ता. १६ (बातमीदार) : सानपाडा पाम बीच परिसरातील केसर सॉलिटेयरजवळ सोनखार भुयारी मार्गाचे भूमिपूजन उत्साहात पार पडले. या वेळी माजी महापौरांनी दिलेले आश्वासन प्रत्यक्षात उतरवणारे नेतृत्व म्हणून दशरथ भगत व भगत कुटुंबीयांचे कौतुक केले.
२०१५ मध्ये मोराज सर्कल परिसरातील वाढती वाहतूक कोंडी कमी करण्यासाठी तत्कालीन नगरसेवक दशरथ भगत यांनी स्वखर्चाने पर्यायी भुयारी मार्गाचा आराखडा तयार करून नवी मुंबई महानगरपालिकेकडे मंजुरीसाठी सादर केला होता. पर्यावरणीय अडथळ्यांमुळे प्रकल्प रखडला होता; मात्र गणेश नाईक वनमंत्री झाल्यानंतर हा अडथळा दूर झाला.
या भुयारी मार्गामुळे मोराज सर्कल येथील रोजची वाहतूक कोंडी कमी होणार असून, अपघात व प्रदूषणात घट होईल. हा प्रकल्प १८ महिन्यांत पूर्ण करण्याचे उद्दिष्ट ठेवण्यात आले आहे.