अंबरनाथ, ता. १६ (वार्ताहर) : रुग्णालयातून उपचार घेऊन घरी परतत असताना रिक्षाचालकाच्या निष्काळजीमुळे ६२ वर्षीय ज्येष्ठ महिलेला अपघाताला सामोरे जावे लागले. या धडकेत महिलेला गंभीर दुखापत झाली असून, डाव्या हाताच्या कोपऱ्याला फॅक्चर झाले आहे. तसेच, डोक्याला व पायाला गंभीर मार लागला आहे. याप्रकरणी अंबरनाथ पोलिसांनी रिक्षाचालकाविरोधात गुन्हा दाखल केला आहे.
अंबरनाथ पश्चिमेतील डिफेन्स कॉलनी परिसरात राहणाऱ्या राणी चिंडालिया या ९ डिसेंबरला रात्री आठच्या सुमारास पतीसोबत अंबरनाथ स्थानक परिसरातील डॉक्टरांकडे उपचार घेऊन पायी घरी परतत होत्या. जठार हॉस्पिटलसमोर भरधाव आलेल्या रिक्षाने वाहतूक नियमांकडे दुर्लक्ष करत त्यांना जोरदार धडक दिली. यात चिंडालिया यांच्या डाव्या हाताच्या कोपऱ्याला फ्रॅक्चर झाले आहे. तसेच डोक्याला आणि डाव्या पायाला गंभीर मुका मार लागला आहे. अपघातानंतर त्यांना तातडीने रुग्णालयात दाखल करण्यात आले. उपचारानंतर सोमवारी त्यांनी अंबरनाथ पोलिस ठाण्यात तक्रार नोंदवली. अंबरनाथ पोलिसांनी अज्ञात रिक्षाचालकाविरोधात गुन्हा दाखल केला आहे. महिला पोलिस उपनिरीक्षक साळवे पुढील तपास करीत आहेत.