आगरी कोळी सेनेच्या प्रमुख पदाधिकाऱ्यांचा भाजपमध्ये जाहीर प्रवेश
विरार, ता. १८ (बातमीदार) : वसई-विरारमधील राजकीय घडामोडींना वेग आला असून, आगरी कोळी सेनेच्या अनेक प्रमुख पदाधिकाऱ्यांनी आमदार स्नेहा दुबे पंडित यांच्या उपस्थितीत भारतीय जनता पक्षात जाहीर प्रवेश केला.
आगरी कोळी सेनेचे पालघर जिल्हा अध्यक्ष भूपेश कडूळकर, वसई तालुका अध्यक्ष जयेश पाटील, सचिव दिनेश सावंत, प्रथमेश सुर्वे आणि चेतन हांडू यांनी भाजपचे कमळ हाती घेतले. या पक्षप्रवेशामुळे वसई-विरार परिसरात भाजपचे संघटनात्मक बळ वाढणार असून, सर्वसामान्यांच्या प्रश्नांना अधिक गती मिळेल, असा विश्वास यावेळी व्यक्त करण्यात आला. आगरी कोळी समाजाच्या हितासाठी आणि सर्वांगीण विकासासाठी हे सर्व सहकारी भाजपच्या माध्यमातून प्रभावीपणे काम करतील, असे मत स्नेहा दुबे पंडित यांनी व्यक्त केले. यावेळी भाजपचे जिल्हा संयोजक सिद्धेश तावडे, मयंक शेठ, गोपी मेनन यांच्यासह मोठ्या संख्येने कार्यकर्ते उपस्थित होते.