एमसीए क्रिकेट स्पर्धेत हिंगोलीचा विजय
पोयनाड, ता. १८ (बातमीदार) : महाराष्ट्र क्रिकेट असोसिएशन यांच्या वतीने आयोजित एकोणीस वर्षांखालील मुलांच्या दोनदिवसीय कसोटी क्रिकेट स्पर्धेत हिंगोली जिल्हा क्रिकेट असोसिएशनच्या संघाने शानदार कामगिरी करत विजय मिळवला. पेण येथील छत्रपती शिवाजी महाराज मैदानावर झालेल्या सामन्यात हिंगोली संघाने बीड जिल्हा क्रिकेट असोसिएशनच्या संघाचा आठ गडी राखून पराभव केला.
नाणेफेक जिंकून प्रथम फलंदाजी करणाऱ्या बीड संघाने पहिल्या डावात १५५ धावा केल्या. श्रेयस खटाळ यांनी ८२ धावांची झुंजार खेळी केली. हिंगोलीकडून कर्णधार ओंकार मोगल यांनी पाच, तर सम्यक बागुल यांनी तीन गडी बाद केले. प्रत्युत्तरात हिंगोलीने १५९ धावा करून चार धावांची आघाडी घेतली; यात सम्यक बागुल यांच्या ८२ धावा महत्त्वाच्या ठरल्या. बीडकडून कृष्ण बिडवे यांनी सहा गडी बाद केले. दुसऱ्या डावात बीडने १३३ धावांवर नऊ गडी बाद झाल्यावर डाव घोषित केला. हिंगोलीकडून ओंकार मोगल यांनी सहा बळी घेतले. १२९ धावांचे लक्ष्य हिंगोलीने केवळ दोन गडी गमावत पूर्ण केले. सलामीवीर सोहम सरगर (५८) आणि कर्णधार ओंकार मोगल (६६) यांच्या खेळीमुळे हिंगोलीला सहज विजय मिळाला.
सामन्यावेळी प्रमुख पाहुणे म्हणून राजू पिचिका, पेण स्पोर्ट्स असोसिएशनचे अध्यक्ष अरुण शिंदे तसेच प्रदीप पाटील, प्रफुल्ल टेमघरे, देवेंद्र पाटील, दिनेश सावंत, शेखर भगत व अभिषेक खातू उपस्थित होते.