भिवंडीत घरफोडीच्या दोन घटना

भिवंडी, ता. १८ (वार्ताहर) : भिवंडी शहरात एक घर आणि एका गोदामात अशा दोन वेगवेगळ्या ठिकाणी घरफोडीच्या घटना घडल्या. यामध्ये सोने-चांदीच्या दागिन्यांचा समावेश आहे. शहरातील वाणी आळी बाजारपेठ येथील जगदीश चंद्रकांत कोंडलेकर यांच्या घरात १६ डिसेंबरच्या रात्री घरफोडी केली. याप्रकरणी निजामपूर पोलिस ठाण्यात घरफोडीचा गुन्हा दाखल करण्यात आला आहे. दुसरी घरफोडीची घटना नारपोली पोलिस ठाण्यात गोदाम हद्दीत घडली आहे.
तालुक्यातील अंजूर दिवे गावाच्या हद्दीतील इंडियन कॉर्पोरेशन गोदाम संकुलातील कोहीनूर टेलीव्हिडिओ प्रा. लि.च्या गोदामात १६ डिसेंबरच्या मध्यरात्रीच्या सुमारास चोरीची घटना घडली. याप्रकरणी कोहीनूर टेलीव्हिडिओ प्रा. लि.चे व्यवस्थापक आनंद जयवंत कांबळे यांनी दिलेल्या तक्रारीवरून घरफोडीचा गुन्हा दाखल केला आहे.