कारमधील लाखोंच्या वस्तू लंपास
नवी मुंबई (वार्ताहर) : कारच्या काचा फोडून त्यातील किमती ऐवज चोरणाऱ्या चोरट्यांनी बुधवारी एपीएमसी, तुर्भे परिसरात लॅपटॉप, रोख रक्कम असा पावणेसहा लाखांचा ऐवज चोरला आहे. या प्रकरणात एपीएमसी, तुर्भे पोलिस ठाण्यात गुन्हा दाखल आहे.
कामोठे येथे राहणारा इंद्रजीतसिंग खत्री (३५), अरुण शर्मा (३२, रा. कोपरखैरणे), अविन रॉड्रीग्ज (२८, रा. डोंबिवली) व हेमंत शिर्के (४०, रा. कल्याण) हे सर्व व्यावसायिक कामानिमित्त एपीएमसी परिसरात कार घेऊन आले होते. एपीएमसी सेक्टर १९ बी, सेक्टर १९ डीमधील रस्त्यालगत त्यांची वाहने उभी केली होती. त्यातील रोख रक्कम, लॅपटॉप, इतर महत्त्वाची कागदपत्रे असा चार लाख ७८ हजारांचा ऐवज चोरला आहे. तर बुधवारी (ता. १७) रात्री ८.३० वाजण्याच्या सुमारास ठाणे-बेलापूर मार्गावरील तुर्भे येथील सुयोग हॉटेलगतच्या रस्त्यावर राजीव रंजन, हिमांशू भट्टाचार्याजी या दोघांच्या कारच्या काचा फोडून त्यांच्या कारमधील एक लाखाचे दोन लॅपटॉप चोरण्यात आले आहेत.