आमदार राम कदम यांनी
पाच वर्षांनंतर कापले केस
घाटकोपर, ता. १८ (बातमीदार)ः घाटकोपर, विक्रोळी, पार्कसाईट परिसरातील नागरिकांचा पाणीप्रश्न सुटेपर्यंत केस कापणार नाही, अशी भीष्मप्रतिज्ञा घेतलेल्या आमदार राम कदम यांनी अखेर पाच वर्षांनंतर केस कापले. वर्षानगर येथे नागरिकांच्या उपस्थितीत त्यांनी केस कापत दिलेल्या शब्दाची पूर्तता केली.
घाटकोपर, विक्रोळी, पार्कसाईट परिसरातील नागरिकांना अनेक वर्षांपासून तीव्र पाणीटंचाईला सामोरे जावे लागत होते. या पार्श्वभूमीवर पाच वर्षांपूर्वी कदम यांनी, या परिसरातील पाणीप्रश्न सुटणार नाही, तोवर डोक्यावरचा एकही केस कापणार नाही, अशी जाहीर प्रतिज्ञा केली होती. पालकमंत्री आशीष शेलार यांच्या हस्ते आनंदगड येथील पाण्याच्या टाकीची क्षमता वाढविण्यासाठी भूमीपूजन नुकतेच झाले होते. आज बांधकामाचे पूजन आमदार कदम यांच्या हस्ते पार पडले. त्यानंतर कदम यांनी आपली प्रतिज्ञा पूर्ण करत डोक्यावरील केस कापले.