उल्हासनगरात प्रस्थापितांना पदाधिकाऱ्यांचे आव्हान
निवडून येण्याची पात्रता-क्षमता असणाऱ्यांना संधी ः जिल्हाप्रमुख गोपाळ लांडगे यांचे मत
उल्हासनगर, ता. १८ (बातमीदार) ः महानगरपालिका निवडणुकीच्या रणधुमाळीला सुरुवात झाली असून, शिवसेनेने नुकतेच इच्छुक उमेदवारांचे अर्ज स्वीकारले आहेत. यामध्ये वर्षानुवर्षे निवडून येणाऱ्या प्रस्थापित माजी नगरसेवकांसमोर पक्षाच्याच स्थानिक पदाधिकाऱ्यांनी शड्डू ठोकला आहे. यामुळे याठिकाणी कोणाला तिकीटाची लॉटरी लागणार याकडे सर्वांचेच लक्ष लागले आहे.
मराठा सेक्शनमधील शिवसेना मध्यवर्ती शाखेत कल्याण जिल्हाप्रमुख गोपाळ लांडगे, आमदार डॉ. बालाजी किणीकर, उपजिल्हाप्रमुख अरुण आशान, प्रवक्ते किरण सोनवणे यांच्या उपस्थितीत प्रभाग क्रमांक एक ते वीससाठी इच्छुक उमेदवारांचे अर्ज स्वीकारण्यात आले. विशेष म्हणजे प्रस्थापित माजी नगरसेवकांनी इच्छुक म्हणून अर्ज सादर केले आहेत. तर, त्यांच्याच प्रभागातील पदाधिकाऱ्यांनीही अर्ज सादर केल्याने हा चर्चेचा विषय ठरला आहे.
दरम्यान, पदाधिकारी कामे करतात, आंदोलनात सहभागी होतात. ही वस्तुस्थिती असून निवडणुकीला उभे राहण्याचे त्यांचेही स्वप्न आहे. मात्र, निवडून येण्याची पात्रता-क्षमता आवश्यक असून उपमुख्यमंत्री एकनाथ शिंदे, खासदार डॉ. श्रीकांत शिंदे हे निर्णय घेतील, अशी माहिती गोपाळ लांडगे यांनी दिली.