वीज कर्मचाऱ्यांना मिळणार अत्याधुनिक सुरक्षा साधने

मुंबई, ता. २० : वीज कर्मचारी हा महावितरणचा आधारस्तंभ आहे. या कर्मचाऱ्यांच्या सुरक्षेसाठी उच्च दर्जाची अत्याधुनिक सुरक्षा साधने खरेदी केली जाणार असल्याची ग्वाही महावितरणने दिली आहे.
महावितरणच्या वतीने नुकतेच पुणे येथे अत्याधुनिक सुरक्षा साधनांच्या प्रात्यक्षिकांचे आयोजन केले होते. यापुढे महावितरणच्या कर्मचाऱ्यांसाठी अत्याधुनिक आणि उच्च गुणवत्तेची सुरक्षा साधने खरेदी करणार असल्याचे कंपनीचे संचालक (मानव संसाधन) राजेंद्र पवार यांनी सांगितले. त्यामुळे वीजवाहिन्यांवर काम करणाऱ्या कामगारांना सुरक्षेची हमी मिळणार असल्याचे स्पष्ट झाले आहे. ग्राहकांना अखंडित व गुणवत्तापूर्ण वीजपुरवठा करणे हे महावितरणचे कर्तव्य आहे. वीजपुरवठा अखंडित सुरू ठेवण्यासाठी तसेच बिघाड झाल्यास त्याचा कालावधी कमीत कमी असेल, यावर काम करण्यात आल्याचे पवार यांनी सांगितले.