विलेपार्लेत रंगली बुद्धिबळ स्पर्धा; ४०० हून अधिक खेळाडूंचा उत्स्फूर्त सहभाग
प्रभादेवी, ता. २४ : एफएमसीए-आर.वाय.पी. विलेपार्ले चेस फेस्टिव्हल २०२५ मध्ये लहान मुलांसाठी घेण्यात आलेल्या खुल्या गटातील ब्लिट्झ स्पर्धेला मुलांचा उत्स्फूर्त प्रतिसाद मिळाला. विलेपार्ले येथे आयोजित ही सबर्बन स्पर्धा डिस्ट्रिक्ट चेस असोसिएशन यांच्या मार्गदर्शनाखाली पार पडली. यामध्ये मुख्य पंच म्हणून फिडे अर्बिटर विश्वनाथ माधव यांनी काम पाहिले.
कार्यक्रमास द्रोणाचार्य पुरस्कार विजेते रघुनंदन गोखले, वरिष्ठ प्रशिक्षक सजनदास जोशी आणि फर्स्ट मुव्ह चेस अकॅडमीचे संस्थापक अमर गोडबोले उपस्थित होते. मुंबई, नवी मुंबई, ठाणे, कल्याण, पालघर, पुणे, वापी, वलसाड आणि इंदूर यांसह तब्बल ४०० हून अधिक खेळाडू या स्पर्धेत सहभागी झाले होते. स्पर्धेत ६ ते १५ वर्ष वयोगटातील आठ गटांमध्ये सामने घेण्यात आले आणि प्रत्येक वयोगटातील पहिला, दुसरा व तिसरा क्रमांक मिळवणाऱ्या विजेत्यांचा गौरव करण्यात आला. याशिवाय मुलींसाठी विशेष पारितोषिक, सर्वात लहान मुलगा-मुलगी, सर्वोत्तम ज्येष्ठ खेळाडू आणि तीन उत्कृष्ट अनरेटेड खेळाडूंसाठी विशेष रोख पारितोषिके देण्यात आली.