गरोदर, दिव्यांग शिक्षकांना वगळा
निवडणूक कामकाजाबाबत निवडणूक‍ आयोगाकडे मागणी
मुंबई, ता. २४ : मुंबई महापालिकेच्या निवडणूक कामकाजासाठी मुंबई शिक्षण उपसंचालक कार्यालयाअंतर्गत येणाऱ्या मुंबई, ठाणे, पालघर, रायगड या जिल्ह्यांतील असंख्य शिक्षकांना सेवा बंधनकारक करण्यात आली आहे. यात दहावी-बारावीच्या परीक्षांची मुख्य जबाबदारी असलेल्या आणि दिव्यांग शिक्षकांसोबतच गर्भवती शिक्षिका, स्तनपान करणाऱ्या महिला तसेच गंभीर आजार असलेल्या शिक्षकांना या कामकाजातून वगळण्याची मागणी महाराष्ट्र पुरोगामी शिक्षक संघटनेचे अध्यक्ष तानाजी कांबळे यांनी राज्य निवडणूक आयोगाकडे केली आहे. दरम्यान, निवडणूक ड्युटीवर असलेल्या शिक्षक व शिक्षकेतर कर्मचाऱ्यांचा मतदानाचा लोकशाही हक्क अबाधित राहावा, यासाठी बॅलेट पोस्टद्वारे मतदानाची सुविधा प्रभावीपणे राबवावी, निवडणूक ड्युटीमुळे कोणताही कर्मचारी मतदानापासून वंचित राहू नये, यासाठी प्रशासनाने योग्य जबाबदारी घ्यावी, अशी मागणी करण्यात आली आहे.