डाळिंबासह इतर फळांना मिळणार आंतरराष्ट्रीय बाजारपेठ
सकाळ वृत्तसेवा
मुंबई, ता. २४ : राज्यातील शेतकरी निर्यातक्षम फळे व भाजीपाला पिकवतात. या उत्पादनांना स्पर्धात्मक दर मिळावा, म्हणून आंतरराष्ट्रीय बाजारपेठ उपलब्ध करून देण्यासाठी शासन प्रयत्नशील असल्याचे पणनमंत्री जयकुमार रावल यांनी सांगितले.
राज्यात उत्पादित झालेल्या डाळिंबाचे तीन कंटेनर वाशी येथील सुविधा केंद्रातून के. बी. एक्सपोर्टसचे अध्यक्ष प्रकाश खाखर यांनी नुकतेच ब्रिस्बेन (ऑस्ट्रेलिया), न्यूयॉर्क, लॉस एंजेलिस (अमेरिका) येथे निर्यात केले. त्या पार्श्वभूमीवर पणनमंत्री रावल यांनी प्रकाश खाखर यांचे अभिनंदन केले. त्या वेळी ते बोलत होते. जागतिक बाजारपेठेत भारतीय डाळिंबांची मागणी सातत्याने वाढत आहे. राज्यात उत्पादित होणारे डाळिंब हे अमेरिका, ऑस्ट्रेलिया यासह अन्य देशांत निर्यात होत आहे. टप्प्याटप्प्याने इतर फळांची निर्यात करण्यासाठी पणन विभाग प्रयत्न करीत आहे. यामुळे फळे व भाजीपाला उत्पादक शेतकऱ्यांच्या मेहनतीला जागतिक बाजारपेठेत स्पर्धात्मक मूल्य मिळेल. अमेरिका, ऑस्ट्रेलिया यासह अन्य देशांमध्ये कंटेनर रवाना होणे, हे राज्याच्या कृषीनिर्यात व शेतकऱ्यांना उत्पन्नवाढीच्या दृष्टीने प्रोत्साहित करण्यासाठी अत्यंत महत्त्वाचे पाऊल आहे.