डहाणू परिसरात बिबट्याचा वाढता वावर
आंबेमोरा येथे बकऱ्यावर हल्ला, घटना सीसीटीव्हीत कैद
तारापूर, ता. २८ (बातमीदार) ः डहाणू शहर व परिसरात बिबट्याचा वाढता वावर पुन्हा एकदा समोर आला आहे. आंबेमोरा गावातील सौदागरवाडी येथे शुक्रवारी सायंकाळी बिबट्याने पाळीव बकऱ्यांवर हल्ला केल्याची घटना घडली. संपूर्ण घटना सीसीटीव्ही कॅमेऱ्यात कैद झाल्याने परिसरातील ग्रामस्थांमध्ये भीतीचे वातावरण पसरले आहे.
शुक्रवारी (ता. २६) आंबेमोरा गावातील सौदागरवाडी परिसरात चारा चरण्यासाठी बाहेर असलेल्या बकऱ्यांवर दबा धरून बसलेल्या बिबट्याने हल्ला चढवला. या हल्ल्यात शाबाज सौदागर यांची बकरी बिबट्याने शिकार करून पळवून नेल्याची माहिती मालकाने दिली. मालकाचे आर्थिक नुकसान झाले आहे. नुकसानभरपाई मिळावी, अशी मागणी त्यांनी प्रशासनाकडे केली आहे.
बिबट्याच्या हालचालींवर लक्ष ठेवण्यासाठी परिसरात ट्रॅप कॅमेरे बसवण्यात येणार असल्याची माहिती वन विभागाकडून देण्यात आली. शुक्रवारी पहाटे डहाणू गावातील मस्जिद परिसरात बिबट्या वावरताना सीसीटीव्ही कॅमेऱ्यात कैद झाला होता. त्यानंतर संध्याकाळी आंबेमोरा येथे बिबट्याच्या हल्ल्याच्या घटनेमुळे नागरिकांमध्ये दहशत निर्माण झाली आहे.
----
कोट
घटनेच्या ठिकाणी वन विभागाचे कर्मचारी तात्काळ गस्त व पाहणीसाठी रवाना करण्यात आले आहेत. बिबट्याच्या हालचालींवर बारकाईने लक्ष ठेवण्यासाठी परिसरात ट्रॅप कॅमेरे बसवण्यात येणार असून, प्राप्त माहितीनुसार पुढील योग्य ती कारवाई करण्यात येईल.
- नवीन माच्छी, वन परिक्षेत्र अधिकारी, डहाणू