होली फॅमिली शाळेत बदलत्या काळाचे प्रदर्शन
विरार, ता. २८ (बातमीदार) : वसई येथील होली पॅराडाईज हायस्कूलमध्ये ‘निमित्त २०२५ – युगप्रवाह: काळ आणि परिवर्तनाचा प्रवास’ या अनोख्या प्रदर्शनाचे आयोजन करण्यात आले होते. या उपक्रमातून प्राचीन संस्कृतीपासून ते आजच्या ''जेन-झी'' युगापर्यंत झालेला सामाजिक आणि तांत्रिक बदल विद्यार्थ्यांनी प्रभावीपणे मांडला.
प्रदर्शनात मनोरंजन (रामायण विरुद्ध रील्स), वाहतूक (शक्तिमान विरुद्ध स्विगी), खेळ (खो-खो ते पब्जी), बँकिंग (बाबुराव विरुद्ध UPI) आणि संस्कृती (शिवकाल ते मेटाव्हर्स) अशा रंजक विषयांवर आधारित स्टॉल्स लावण्यात आले होते. विषयाला साजेसे नृत्य आणि नाट्यप्रयोग सादर करण्यात आले. ''शक्तिमान'' आणि ''तारक मेहता..'' यांसारख्या पात्रांच्या माध्यमातून परंपरा व आधुनिकतेचा संगम उलगडण्यात आला. संस्कृती आणि मूल्ये जपूनही आधुनिक प्रगती साधता येते, हा मोलाचा संदेश विद्यार्थ्यांनी दिला.
मुख्याध्यापक मयूर हरिया यांनी विद्यार्थ्यांच्या सर्जनशीलतेचे कौतुक करत, हा उपक्रम संघभावना आणि कल्पकता दर्शवणारा ठरल्याचे सांगितले. पालक आणि नागरिकांनी या प्रदर्शनाला उत्स्फूर्त प्रतिसाद दिला.