ढेकाळे येथे महामार्गालगत आढळला मृतदेह
मनोर, ता.२९ (बातमीदार) : ढेकाळे गावाच्या हद्दीत मुंबई-अहमदाबाद राष्ट्रीय महामार्गालगत अनमोल नर्सरीच्या मागील बाजूस एक मृतदेह आढळून आल्याने परिसरात खळबळ उडाली. सोमवारी दुपारी स्थानिक नागरिकांच्या निदर्शनास कुजलेल्या अवस्थेतील हा पुरुष जातीचा मृतदेह आढळून आला. या घटनेची माहिती मिळताच मनोर पोलिसांनी घटनास्थळी धाव घेत पंचनामा करून मृतदेह शवविच्छेदनासाठी मनोर ग्रामीण रुग्णालयात पाठवण्यात आला आहे. हा मृतदेह कुजलेल्या अवस्थेत असल्याने या व्यक्तीचा मृत्यू महिनाभरापूर्वी झाल्याचा प्राथमिक अंदाज पोलिसांनी व्यक्त केला आहे. याप्रकरणी पोलिसांनी अकस्मात मृत्यूची नोंद करीत तपास सुरू केला आहे. दरम्यान, मृत व्यक्तीची ओळख पटवण्यासाठी पोलिसांकडून परिसरातील सीसीटीव्ही फुटेज तपासले जात असून बेपत्ता व्यक्तींची माहिती घेतली जात आहे.