मिरा-भाईंदरमध्ये राष्ट्रवादी काँग्रेसची वेगळी चूल

भाईंदर, ता. २९ (बातमीदार) : मिरा-भाईंदरमध्ये भाजप व शिवसेनेतील युती अद्याप निश्चित नसताना महायुतीचा तिसरा घटक पक्ष राष्ट्रवादी काँग्रेसने (अजित पवार गट) निवडणूक स्वतंत्रपणे लढण्याची घोषणा केली आहे. राष्ट्रवादी ३८ ते ४० जागांवर लढण्याची तयारी करीत आहे. भाजपचे आमदार नरेंद्र मेहता यांनी काही दिवसांपूर्वीच राष्ट्रवादी काँग्रेसला आठ जागा दिल्याचे घोषित केले होते. मिरा रोड येथील ९ आणि २२ हे दोन प्रभाग अजित पवार गटासाठी सोडण्यात आल्याचे मेहता यांनी सांगितले होते; मात्र राष्ट्रवादीने हा प्रस्ताव फेटाळून लावला. राष्ट्रवादीने भाजप आणि शिवसेनेकडे १९ जागांची मागणी केली होती. त्यावर शिवसेनेकडून अद्याप कोणताही प्रतिसाद देण्यात आलेला नाही, तर भाजपने परस्पर आठ जागा देण्याची घोषणा केली. भाजपचा हा प्रस्ताव मान्य नाही. आम्ही स्वतंत्रपणे निवडणूक लढवणार असून, एकंदर ३८ ते ४० जागांवर लढण्याची तयारी करीत असल्याची माहिती राष्ट्रवादी अजित पवार गटाचे जिल्हाध्यक्ष प्रमोद कांबळे यांनी दिली.