सोनसाखळ्या चोरीप्रकरणी १३ महिलांना अटक
भाईंदर, ता. २९ (बातमीदार) : मिरा रोड येथे आयोजित पंडित प्रदीप मिश्रा यांच्या ‘श्री शिव महापुराण कथा’ कार्यक्रमात महिला भाविकांच्या सोनसाखळ्या चोरणाऱ्या एका मोठ्या टोळीला पोलिसांनी जेरबंद केले आहे. याप्रकरणी काशीगाव पोलिसांनी १३ महिलांना अटक केली असून, त्या सर्व वर्धा जिल्ह्यातील रहिवासी आहेत.
चेंबूर येथील शिवकुमार यादव यांच्या आईचा सोन्याचा हार पहिल्या दिवशी चोरीला गेला होता. त्यानंतर यादव यांनी दुसऱ्या दिवशी परिसरातील हालचालींवर लक्ष ठेवले. ५-६ महिला एका महिला भक्ताला धक्काबुक्की करून तिची साखळी हिसकावताना त्यांना दिसल्या. यादव यांनी या घटनेचे चित्रण आपल्या मोबाईलमध्ये करून तत्काळ पोलिसांना माहिती दिली. या माहितीच्या आधारे गुन्हे अन्वेषण शाखेने रविवारी (ता. २८ ) कार्यक्रमस्थळी आणि बस थांब्यांवर सापळा रचला. या वेळी गटागटाने चोरी करणाऱ्या १३ महिलांना रंगेहात पकडण्यात आले. गर्दीचा फायदा घेऊन या महिला दागिने चोरत होत्या. या कारवाईमुळे परिसरात मोठी खळबळ उडाली आहे.