अखेर शिवसेना-भाजप युतीवर शिक्कामोर्तब
सकाळ वृत्तसेवा
ठाणे, ता. २९ : ठाणे महापालिकेच्या आगामी निवडणुकीसाठी उपमुख्यमंत्री एकनाथ शिंदे यांच्या नेतृत्वाखालील शिवसेना आणि भाजप यांच्यात अखेर युती करण्यावर शिक्कामोर्तब झाले आहे. सोमवारी (ता. २९) रात्री उशिरा टेंभी नाका येथील आनंद आश्रमात झालेल्या बैठकीत दोन्ही पक्षांमध्ये जागावाटपाचा अंतिम फॉर्म्युला ठरवण्यात आला. यामध्ये शिवसेना शिंदे गट ८७ जागांवर तर भाजप ४० जागांवर निवडणूक लढवणार आहे. तसेच उर्वरित चार जागा मुंब्रा विकास आघाडीला सोडण्यात आल्या आहेत. ठाणे महापालिकेच्या निवडणुकीसाठी शिवसेना आणि भाजप यांच्यात युती करायची की नाही, यावर गेल्या काही काळापासून चर्चा सुरू होत्या. जागावाटपाच्या मुद्द्यावरून दोन्ही पक्षांमध्ये आतापर्यंत तीन बैठका झाल्या होत्या; मात्र या बैठकांमधून कोणताही ठोस निष्कर्ष निघाला नव्हता. अखेर सोमवारी रात्री झालेल्या बैठकीत दोन्ही पक्षांच्या स्थानिक नेत्यांमध्ये सखोल चर्चा झाली आणि जागावाटपाचा तिढा सुटला. या बैठकीला शिवसेनेकडून खासदार नरेश म्हस्के, युवासेना कार्याध्यक्ष पूर्वेश सरनाईक, हेमंत पवार, तर भाजपकडून आमदार निरंजन डावखरे आणि शहराध्यक्ष संदीप लेले उपस्थित होते.