ठक्कर बाप्पा योजनेत अन्याय
जव्हारमध्ये सरपंच संघटनेचे आमरण उपोषण
जव्हार, ता. ३० (बातमीदार) : आदिवासी विकास योजनांमधील प्रशासकीय दिरंगाई आणि ठक्कर बाप्पा योजनेच्या निधी वाटपातील भेदभावाविरोधात जव्हार तालुक्यातील सरपंच संघटनेने सोमवारपासून (ता. २९) आदिवासी विकास प्रकल्प कार्यालयासमोर आमरण उपोषण सुरू केले आहे.
लोकसंख्येच्या प्रमाणात निधी न देता ठरावीक ग्रामपंचायतींनाच झुकते माप दिले जात असल्याचा आरोप सरपंच संघटनेने केला आहे. यात ‘टक्केवारी’चे राजकारण चालत असल्याची टीका डेंगाचीमेटचे सरपंच कमळाकर धूम यांनी केली. प्रशासनाच्या मनमानी कारभारामुळे रस्ते, पाणी, आरोग्य आणि शाळा यांसारखी मूलभूत कामे रखडली असून, आदिवासी गावांचा विकास खुंटला आहे. वारंवार पाठपुरावा करूनही प्रस्ताव प्रलंबित राहत असल्याने सरपंचांनी हे टोकाचे पाऊल उचलले आहे. या उपोषणाला युवा आदिवासी संघ (जव्हार), मोखाडा सरपंच संघटना आणि आदिवासी विकास हक्क समितीसह अनेक सामाजिक संस्थांनी पाठिंबा दिला आहे.
प्रशासनाने यावर त्वरित तोडगा काढावा, अशी मागणी आंदोलनकर्त्यांनी केली असून, आंदोलनात सरपंच, उपसरपंच आणि ग्रामस्थ मोठ्या संख्येने सहभागी झाले आहेत.
-------------
जर सर्व ग्रामपंचायतींना लोकसंख्येच्या प्रमाणात विकास निधी दिला नाही गेला, तर अन्नत्याग सुरू केला जाईल. हा अन्याय आता सहन केला जाणार नाही.
- एकनाथ दरोडा, अध्यक्ष, जव्हार तालुका सरपंच संघटना