जव्हार बस स्थानकात पाणीटंचाई
प्रवासी आणि कर्मचाऱ्यांचे हाल
जव्हार, ता. ३१ (बातमीदार) : पालघर जिल्ह्यातील एक महत्त्वाचे केंद्र असलेल्या जव्हार बस स्थानकात गेल्या महिनाभरापासून पाणीपुरवठा खंडित झाला आहे. प्रशासनाच्या कमालीच्या उदासीनतेमुळे प्रवाशांसह एसटी कर्मचाऱ्यांना पाण्यासाठी वणवण करावी लागत असून, स्वच्छतेचा प्रश्नही ऐरणीवर आला आहे. जव्हार तालुक्यातील ४८ ग्रामपंचायती आणि दोन ग्रामदान मंडळांतील नागरिक विविध कामांसाठी या बस स्थानकावर येत असतात; मात्र सुसज्ज स्थानक असूनही येथे पिण्याच्या पाण्याची सोय नाही.

एसटी कर्मचाऱ्यांच्या विश्रामगृहातील शौचालयात पाणी नसल्याने महिला व पुरुष कर्मचाऱ्यांची मोठी गैरसोय होत आहे. लांब पल्ल्याच्या प्रवाशांना पिण्यासाठी विकतचे पाणी घ्यावे लागत असून स्थानकातील स्वच्छतागृहांची अवस्थाही बिकट झाली आहे. महिन्याभरापासून सुरू असलेल्या या समस्येकडे एसटी प्रशासनाचे वारंवार लक्ष वेधूनही अद्याप कोणतीही ठोस कारवाई झालेली नाही. या परिस्थितीत सुधारणा न झाल्यास ‘काम बंद’ आंदोलन पुकारण्याचा इशारा कर्मचारी संघटनांनी दिला आहे. याबाबत एसटी प्रशासनाशी संपर्क साधला असता, पाण्याचा प्रश्न तांत्रिक कारणांमुळे निर्माण झाला असून, तो सोडवण्यासाठी लवकरच उपाययोजना केल्या जातील, असे मोघम उत्तर देण्यात आले आहे.