गव्हाण कोळीवाड्यात सांस्कृतिक महोत्सव
आगरी-कोळी परंपरेचा जागर; पंचक्रोशीतील नागरिकांचा प्रतिसाद
उलवे, ता. ३० (बातमीदार) : पनवेल तालुक्यातील गव्हाण कोळीवाडा येथे आयोजित करण्यात आलेला ‘गव्हाण कोळीवाडा सांस्कृतिक महोत्सव २०२५’ यंदा पहिल्यांदाच मोठ्या उत्साहात आणि जल्लोषात पार पडला. ग्रामपंचायत सभागृह मैदानात झालेल्या या सांस्कृतिक कार्यक्रमाने संपूर्ण परिसरात उत्सवाचे वातावरण निर्माण केले होते.
या महोत्सवाचा मुख्य उद्देश आगरी-कोळी समाजाची समृद्ध परंपरा, लोकसंस्कृती आणि जीवनपद्धती नव्या पिढीपर्यंत पोहोचवणे हा होता. यानिमित्ताने पारंपरिक कोळी नृत्य, आगरी-कोळी लोकगीते, ढोल-ताशांच्या तालावर सादर झालेली नृत्याविष्कारे तसेच पारंपरिक वेशभूषेचे सादरीकरण पाहण्यासाठी ग्रामस्थांसह पंचक्रोशीतील नागरिकांनी मोठ्या संख्येने उपस्थिती लावली होती. रंगीबेरंगी पोशाख, उत्स्फूर्त नृत्य आणि पारंपरिक संगीतामुळे संपूर्ण परिसरात कोळीवाड्याच्या संस्कृतीचा जागर अनुभवायला मिळाला. या सांस्कृतिक महोत्सवाला विविध आगरी-कोळी सोशल मीडिया इन्फ्लुएन्सर्सनी उपस्थिती दर्शवून कार्यक्रमाची शोभा वाढवली. त्यांच्या उपस्थितीमुळे तरुणाईमध्ये कार्यक्रमाबद्दल विशेष आकर्षण निर्माण झाले. अनेक तरुणांनी कार्यक्रमाचे फोटो व व्हिडीओ सोशल मीडियावर शेअर करत आगरी-कोळी संस्कृतीचा प्रचार-प्रसार केला. हा महोत्सव समस्त ग्रामस्थ मंडळ, गव्हाण कोळीवाडा यांच्या वतीने आयोजित करण्यात आला होता.