अर्ज दाखल केल्यानंतर उमेदवाराचा मृत्यू
मिरा रोड येथील घटना
भाईंदर, ता. ३० (बातमीदार) : मिरा भाईंदर महापालिकेच्या निवडणुकीसाठी उमेदवारी अर्ज दाखल केल्यानंतर उमेदवाराचा मृत्यू झाल्याची दुर्दैवी घटना मिरा रोड येथे मंगळवारी (ता. ३०) घडली आहे. जावेद पठाण (वय ६६) असे मृत उमेदवाराचे नाव आहे. त्यांनी राष्ट्रवादी काँग्रेस अजित पवार गटाकडून उमेदवारी अर्ज दाखल केला होता.
जावेद पठाण यांनी उमेदवारी दाखल कारण्याच्या शेवटच्या दिवशी (ता. ३०) प्रभाग क्रमांक २२ मधून राष्ट्रवादी काँग्रेस पक्षातर्फे अर्ज दाखल केला होता. निवडणूक निर्णय अधिकाऱ्यांकडे अर्ज दाखल करून बाहेर आल्यानंतर त्यांची प्रकृती अचानक बिघडली. त्यांना तातडीने उपचारासाठी खासगी रुग्णालयात दाखल करण्यात आले, मात्र उपचार सुरू होण्यापूर्वीच त्यांचा मृत्यू झाला.
-------
हृदयविकाराचा झटका
भाजपच्या माजी महिला जिल्हाध्यक्ष वनिता बने यांनी आपल्या मुलीसाठी पक्षाकडे उमेदवारी मागितली होती. मात्र सोमवारी सायंकाळी मुलीला उमेदवारी मिळत नसल्याचे स्पष्ट झाले. त्यामुळे त्यांना मानसिक ताण येऊन अस्वस्थ वाटू लागले. त्यांना खासगी रुग्णालयात दाखल करण्यात आले असून, त्यांची प्रकृती स्थिर आहे. यासंदर्भात भाजपचे आमदार नरेंद्र मेहता यांना विचारले असता, भाजपच्या उमेदवारांची यादी मंगळवारी जाहीर झाली; मात्र बने यांची प्रकृती सोमवारीच बिघडली, असे त्यांनी सांगितले.