ठाण्यात काँग्रेसने दिले ९५ उमेदवार
सकाळ वृत्तसेवा
ठाणे, ता. ३१ : ठाणे पालिका निवडणुकीसाठी महाविकास आघाडीमध्ये बोलणी फिस्कटल्यानंतर काँग्रेसने स्वबळाचा नारा दिला. त्यानंतर काँग्रेसने शहरातील जवळजवळ प्रत्येक ठिकाणी आपला उमेदवार दिला आहे. १३१ पैकी काँग्रेसने ९५ ठिकाणी आपले उमेदवार दिले आहेत.
महाविकास आघाडीच्या माध्यमातून काँग्रेसने ठाण्यात निवडणूक लढविण्याची भूमिका घेतली होती. त्यानुसार सुरुवातीला ३५ जागांची मागणी त्यांनी केली होती. तडजोडीत त्यांनी २५ जागा तरी सोडाव्यात, अशी भूमिका घेतली. सरतेशेवटी काँग्रेसला १० जागांची ऑफर देण्यात आली; मात्र ठाण्यात काँग्रेसचे अस्तित्व असल्याने काँग्रेसचा योग्य सन्मान करावा, अशी भूमिका शहराध्यक्ष विक्रांत चव्हाण यांनी घेतली होती. अखेर महाविकास आघाडीतून फारकत घेत काँग्रेसने ९५ जागा लढविण्याचे जाहीर करीत या सर्वच उमेदवारांना एबी अर्ज दिले. त्यामुळे ठाण्यात सर्वाधिक जागा लढविणारा पक्ष हा काँग्रेस ठरला आहे.