श्रमदानातून महालक्ष्मी गडाच्या पायवाटेची दुरुस्ती
कासा, ता. ३१ (बातमीदार) : डहाणू तालुक्यातील प्रसिद्ध तीर्थक्षेत्र असलेल्या विवळवेढे येथील महालक्ष्मी गडाची पायवाट ग्रामस्थांनी पुढाकार घेऊन दुरुस्त केली आहे. पावसामुळे ही वाट अत्यंत खराब आणि निसरडी झाली होती, ज्यामुळे भाविकांना अपघाताचा धोका निर्माण झाला होता.
पावसाच्या प्रवाहामुळे पायवाटेवरील माती वाहून गेली होती आणि दगडधोंड्यांमुळे रस्ता चालण्यायोग्य राहिला नव्हता. यासाठी गावातील तरुणांनी आणि नागरिकांनी एकत्र येत प्रत्यक्ष श्रमदान केले. गावातील प्रतिष्ठित नागरिक संतोष देशमुख यांनी या कार्यासाठी आर्थिक सहकार्य व आवश्यक साहित्य उपलब्ध करून दिले. त्यानंतर केलेल्या दुरुस्तीमुळे आता महालक्ष्मी गडावर जाणे अधिक सोयीचे व सुरक्षित झाले असून, भाविक व पर्यटकांनी विवळवेढे ग्रामस्थांच्या या सामाजिक उपक्रमाचे मनापासून कौतुक केले आहे.