मिरा-भाईंदरमध्ये उत्तर भारतीय महापौर!
वादंगानंतर कृपाशंकर सिंह यांची सारवासारव
भाईंदर, ता. ३१(बातमीदार) : मिरा-भाईंदरमध्ये एवढे नगरसेवक निवडून आणू की महापालिकेत उत्तर भारतीय महापौर बसेल, असे वक्तव्य भाजपचे नेते कृपाशंकर सिंह यांनी केल्याचे समोर आले. त्याबाबतची ही चित्रफीत समाजमाध्यमांवर व्हायरल झाल्यानंतर नव्या वादाला तोंड फुटले. शिवसेना ठाकरे गट आणि मनसेने जोरदार टीका केली आहे. दरम्यान, आपल्या विधानाचा विपर्यास करण्यात आला असून हिंदू महापौरच निवडून येईल, असा खुलासा त्यांनी केला.
गेल्या आठवड्यात मिरा रोड येथे झालेल्या भाजपच्या उत्तर भारतीय संमेलनात कृपाशंकर उपस्थित होते. त्या वेळी त्यांनी मिरा भाईंदर महापालिकेत नरेंद्र मेहता, डिंपल मेहता, गीता जैन आदी राजस्थानी समाजाचे महापौर झाले आहेत. शहरात उत्तर भारतीयांची संख्या लक्षणीय आहे. त्यामुळे या वेळी उत्तर भारतीय महापौर व्हावा, अशी सर्वांची इच्छा असल्याने एवढे नगरसेवक निवडून आणू की महापालिकेत उत्तर भारतीय समाजाच महापौर बसेल, असे विधान केले होते. या वक्तव्याची चित्रफीत आता व्हायरल झाल्यानंतर विरोधकांनी भाजपवर टीकास्र सोडले आहे.