राष्ट्रीय उद्यानात ३१ डिसेंबर साजरा
मुलांसह आजी-आजोबांनी केली गर्दी

कांदिवली, ता. १ (बातमीदार) : ३१ डिसेंबर म्हणजेच वर्षाअखेरचा दिवस अनेकांनी बोरिवलीतील संजय गांधी राष्ट्रीय उद्यानात साजरा केला. व्याघ्र सफारी, सुगंधी उद्यान, गांधी टेकडी, निसर्ग माहिती केंद्र आणि कणेरी केव्हज अशी पर्यटनस्थळे फिरत लहान मुलांसह त्यांचे पालक, आजी-आजोबा यांनी राष्ट्रीय उद्यानाची सैर केली.
अनेक मुंबईकरांनी निसर्गाच्या सान्निध्यात ३१ डिसेंबर साजरा करणे पसंत केले. संजय गांधी राष्ट्रीय उद्यानाच्या गेट परिसरात बुधवारी सकाळपासून वाहनांच्या रांगा लागल्या होत्या. अनेकांनी निसर्गाच्या सान्निध्यात बोटिंगचा, बसमधून व्याघ्र सफारीचा आनंद लुटला. तरुण-तरुणींनी बोचरी थंडी झेलत हिरव्यागार जंगलातून सायकलवरून फेरफटका मारला. पालकांनी मुलांसह झाडाखाली, नदीच्या काठी दुपारच्या जेवणाचा आस्वाद घेतला. बोरे, आंबट चिंचा, मसाल्याच्या चिंचा, कैरीच्या खापा, काकडी, पेरू, मिठात उकडलेल्या शेंगा आणि चणे यांचा आनंद पर्यटकांनी घेतला. या वेळी अनेक पर्यटकांना सेल्फी घेण्याचा आनंद अनावर झाला होता.