उल्हासनगर, ता. १ (वार्ताहर) : उल्हासनगर शहरातील कायदा व सुव्यवस्थेला धोका निर्माण करणाऱ्या गुन्हेगारी प्रवृत्तीविरोधात पोलिसांनी कठोर भूमिका घेत मोठी कारवाई केली आहे. हिललाईन पोलिस ठाण्यात गंभीर गुन्ह्यांत गुंतलेल्या सराईत तरुण आरोपीला थेट पुण्यातील येरवडा मध्यवर्ती कारागृहात स्थानबद्ध करण्यात आले आहे.
हिललाईन पोलिस ठाण्याच्या हद्दीत दाखल गंभीर गुन्ह्यातील आरोपी साहिल गायसमुद्रे (वय २५, रा. प्रेमनगर टेकडी, उल्हासनगर–५) याच्यावर ही कठोर कारवाई करण्यात आली आहे. विविध कायद्यांतर्गत गुन्हे दाखल असलेल्या या आरोपीला स्थानबद्ध आदेशान्वये कारागृहात पाठविले आहे. ठाणे पोलिस आयुक्त आशुतोष डुंबरे यांनी दिलेल्या आदेशाच्या अनुषंगाने आणि मा. न्याय दंडाधिकारी प्रथम वर्ग, ५वे न्यायालय, उल्हासनगर यांच्याकडून आवश्यक ती कायदेशीर परवानगी घेण्यात आली. त्यानंतर पोलिस उपायुक्त सचिन गोरे यांच्या मार्गदर्शनाखाली वरिष्ठ निरीक्षक संदीप शिवले यांच्या पथकाने संबंधित आरोपीला येरवडा मध्यवर्ती कारागृह, पुणे येथे स्थानबद्ध केले. शहरात वारंवार कायदा व सुव्यवस्थेला बाधा निर्माण करणाऱ्या गुन्हेगारी प्रवृत्तीवर कठोर नियंत्रण ठेवण्यासाठी ही कारवाई केल्याचे पोलिस प्रशासनाकडून स्पष्ट करण्यात आले आहे.