विद्यार्थ्यांनी गुंफले आकर्षक फुलांचे आविष्कार
कलेच्या दुनियेत रमले बालकलाकार
माणगाव, ता. १ (वार्ताहर) : माणगाव शिक्षण प्रसारक मंडळाच्या सुधाकर नारायण शिपूरकर इंग्रजी माध्यम प्राथमिक शाळेत नुकतीच पार पडलेली पुष्पगुच्छ स्पर्धा चिमुकल्या विद्यार्थ्यांच्या सर्जनशीलतेचा रंगतदार आविष्कार ठरली. इयत्ता पहिली ते पाचवीतील विद्यार्थ्यांनी रंगीबेरंगी कागद, कल्पक नक्षीकाम आणि आकर्षक मांडणीच्या साहाय्याने विविध फुलांचे सुंदर पुष्पगुच्छ साकारले. शाळेच्या वर्गखोल्या जणू फुलांच्या दुनियेत परिवर्तित झाल्याचे चित्र पाहायला मिळाले.
फुले घडवताना विद्यार्थी इतके तल्लीन झाले होते, की त्यांना वेळेचे भानही राहिले नाही. त्यांच्या चेहऱ्यावरील आनंद, डोळ्यांतील चमक आणि हातातील कौशल्य पाहून शिक्षक व पालकही भारावून गेले. देशविदेशातील फुलांची रूपे, रंगसंगती आणि सुबक सजावट यामधून विद्यार्थ्यांची कल्पनाशक्ती प्रकर्षाने दिसून आली. या स्पर्धेत सुमारे ९० विद्यार्थ्यांनी उत्स्फूर्त सहभाग घेतला.

चौकट
सर्जनशीलतेतून आत्मविश्वासाला बळ
विद्यार्थ्यांमधील सुप्त कलागुणांना वाव मिळावा, आत्मविश्वास वाढावा आणि कल्पनाशक्तीला दिशा मिळावी, या उद्देशाने शाळेत असे उपक्रम राबवले जातात. या स्पर्धेमुळे विद्यार्थ्यांना स्वतःची कला मांडण्याची संधी मिळाली. सहभागी सर्व विद्यार्थ्यांचा वार्षिक पारितोषिक वितरण समारंभात गौरव करण्यात येणार असून लवकरच त्यांच्या कलावस्तूंचे भव्य प्रदर्शनही आयोजित केले जाणार आहे.