वाशी, ता. १ (बातमीदार) : नवी मुंबई महापालिकेच्या ३४व्या वर्धापनदिनानिमित्त आयुक्त डॉ. कैलास शिंदे यांनी नागरिकांना नववर्षाच्या शुभेच्छा दिल्या. यानिमित्त नवी मुंबई महापालिका मुख्यालयात वर्धापनदिनाच्या शुभेच्छा देणारी आकर्षक रांगोळी काढण्यात आली आहे. त्यातून प्रत्येकाने मतदानाचा हक्क बजावावा, असा प्रभावी संदेश देण्यात आला आहे.

नवी मुंबई महापालिकेची निवडणूक १५ जानेवारीला होत असून, त्या पार्श्वभूमीवर नागरिकांमध्ये मतदानाबाबत जनजागृती करण्याचा उद्देश या उपक्रमामागे आहे. रांगोळीसमवेत महापालिका आयुक्त तथा निवडणूक अधिकारी डॉ. कैलास शिंदे, मुख्य निवडणूक निरीक्षक तथा महाराष्ट्र पेट्रोकेमिकल्स महामंडळाचे व्यवस्थापकीय संचालक डॉ. भाऊसाहेब दांगडे, अतिरिक्त आयुक्त सुनील पवार व डॉ. राहुल गेठे, शहर अभियंता शिरीष आरदवाड, मुख्य लेखा व वित्त अधिकारी सत्यवान उबाळे, किसनराव पलांडे यांच्यासह विविध विभागप्रमुख व अधिकारी उपस्थित होते.