शिंदे गटाचे चार उमेदवार बिनविरोध
कल्याण-डोंबिवलीत शिवसेनेची वेगवान घोडदौड
सकाळ वृत्तसेवा
डोंबिवली, ता. १ ः कल्याण-डोंबिवलीत शिवसेना शिंदे गटाचे चार उमेवार बिनविरोध निवडून आले आहेत. यात प्रभाग क्रमांक २८ मधून हर्षल राजेश मोरे हे बिनविरोध विजयी झाले आहेत. ते कल्याण ग्रामीणचे विद्यमान आमदार राजेश मोरे यांचे पुत्र असल्याने या विजयाला विशेष राजकीय महत्त्व प्राप्त झाले आहे.
प्रभाग क्रमांक २४ मधून रमेश म्हात्रे, विश्वनाथ राणे आणि वृषाली जोशी हे शिवसेनेचे तीन उमेदवार बिनविरोध विजयी झाले होते. त्यात आता आमदारांच्या मुलाच्या विजयाची भर पडल्याने शिवसेनेच्या बिनविरोध विजयी नगरसेवकांची संख्या चारवर पोहोचली आहे. विरोधकांकडून उमेदवार न उभे राहणे किंवा माघार घेणे, हे या प्रभागातील शिवसेनेची पकड किती भक्कम आहे, याचे स्पष्ट संकेत देत आहे. या विजयामुळे शिवसेना कार्यकर्त्यांमध्ये मोठा उत्साह आहे. सूत्रांच्या माहितीनुसार, येत्या काही दिवसांत आणखी काही प्रभागांमध्येही शिवसेनेचे उमेदवार बिनविरोध निवडून येण्याची शक्यता नाकारता येत नाही. एकूणच, आमदारांच्या मुलाच्या बिनविरोध विजयामुळे कल्याण-डोंबिवलीतील शिवसेनेची विजयी घोडदौड अधिक वेग घेत आहे.
-------
पक्षातील वरिष्ठ उपमुख्यमंत्री शिंदे व खासदार डॉ. शिंदे यांचे विशेष मार्गदर्शन आणि त्यांचे सहकार्य, यामुळे हा विजय मिळाल्याची भावना आमदार मोरे यांच्या पत्नी व माजी नगरसेविका भारती मोरे यांनी व्यक्त केली आहे.