नवी मुंबई (वार्ताहर) : गुजरातच्या कच्छ परिसरातील एका तरुणाने उलवे येथील महिलेला लग्नाच्या भूलथापा देत पाच वर्षे लैंगिक अत्याचार केले. त्यानंतर तिच्यासोबत लग्न न करता पलायन केल्याची घटना उघडकीस आले आहे. रिझवान इस्माईल सैय्यद (वय २७) याच्याविरोधात न्हावा शेवा पोलिसांनी गुन्हा दाखल केला आहे. विधवा असलेली पीडित महिला डबे बनविण्याचे काम करून आपला उदरनिर्वाह करीत होती. रिझवान हा २०२१ मध्ये जेएनपीए परिसरात कामाला असल्याने तो उलवेमध्ये राहत होता. त्या वेळी त्याची महिलेसोबत ओळख झाली होती. या ओळखीचे रूपांतर मैत्रीत झाल्यानंतर त्याने महिलेला लग्न करणार असल्याचे सांगत अनेक वेळा अत्याचार केले. या कालावधीत तो पीडित महिलेसोबत राहत होता. फेब्रुवारी २०२५ मध्ये त्याने आपल्या मूळ गावी पलायन केले. त्यानंतर त्याने मूळ गावी दुसऱ्या मुलीसोबत साखरपुडा केला. ही बाब पीडितेला समजल्यानंतर त्याला याचा जाब विचारला असता, त्याने लग्न करण्यास नकार दिला.