सर्व जातीधर्मांसाठी एकनाश शिंदे यांनी निर्णय घेतले
शिवसेना प्रवक्त्या शायना एन. सी. यांचे प्रतिपादन

मुंबई, ता. २ : राज्यातील अल्पसंख्याक समाजाच्या विकासासाठी शिवसेनेचे मुख्य नेते व उपमुख्यमंत्री एकनाथ शिंदे यांनी गेल्या साडेतीन वर्षांत अनेक निर्णय घेतले. अल्पसंख्याकांसाठी अनेक योजना केल्या असल्या तरी मुंबईत मराठी माणूस, मराठी अस्मितेला शिवसेनेचे सर्वोच्च प्राधान्य होते आणि राहील, असे प्रतिपादन शिवसेनेच्या राष्ट्रीय प्रवक्त्या शायना एन. सी. यांनी केले. बाळासाहेब भवन येथे शुक्रवारी (ता. २) आयोजित पत्रकार परिषदेत त्या बोलत होत्या.

शायना एन. सी. म्हणाल्या, की मुख्यमंत्री असताना शिंदे यांनी जातधर्म न पाहता निर्णय घेतले आणि कल्याणकारी योजना लागू केल्या. यात मदरशांच्या आधुनिकीकरणासाठी १० लाख रुपये, शिक्षकांच्या वेतनात वाढ करून १८ हजार केली, अल्पसंख्याक विद्यार्थ्यांना ५० हजारांपर्यंत शिष्यवृत्ती तसेच परदेशी शिष्यवृत्ती देण्यात आली. अल्पसंख्याक समुदायात उद्योजकतेला प्रोत्साहन देण्यासाठी मौलाना आझाद आर्थिक विकास महामंडळासाठी एक हजार कोटी देण्यात आले. लाडकी बहीण योजनेतून अल्पसंख्याक समुदायातील लाखो महिलांना लाभ देण्यात आला. स्वच्छ शौचालये, आयुष्मान भारत कार्ड, घरकुल योजना, मोफत रेशन अशा योजनांमध्ये मुस्लिम आणि अल्पसंख्याक समुदायाला लाभ देण्यात आले. अल्पसंख्याक समुदायाच्या संरक्षणाबरोबर त्यांच्या सर्वांगीण विकासासाठी कटिबद्ध असल्याचे शिवसेना मुख्य नेते एकनाथ शिंदे यांनी दाखवून दिले.

पहलगाममधील दहशतवादी हल्ल्यावेळी जीवाची पर्वा न करता भारतीय कुटुंबांचे रक्षण करणाऱ्या घोडेवाला सईद आदील हुसेन शाह यांना घर बांधून देण्याचे काम शिवसेनेने केले. मुंबई आणि महाराष्ट्रातील अल्पसंख्याकांना आर्थिक, सामाजिक न्याय आणि सन्मान मिळावा, अशी शिवसेनेची भूमिका असल्याचे शायना यांनी सांगितले. अल्पसंख्याकांसाठी जैन आर्थिक विकास मंडळाला मान्यता देण्यात आली. बुद्धिस्ट संस्थेला १० लाखांचे अनुदान देण्यात आले. व्होटबँकेचे राजकारण न करता शिंदे यांनी सर्व समाजांच्या विकासाचे धोरण राबवले, असे शायना एन. सी. म्हणाल्या.

महायुतीचा विजय होणार
महापालिका निवडणुकीच्या पूर्वीच शिवसेनेचे सात नगरसेवक बिनविरोध निवडून आले. हा फक्त ट्रेलर असून पिक्चर अजून बाकी आहे. २९ महापालिकांवर महायुतीचा विजय होईल, असा विश्वास शायना एन. सी. यांनी व्यक्त केला. कल्याण-डोंबिवली महापालिकेच्या प्रभाग २४ मधून रमेश म्हात्रे, विश्वनाथ राणे, वृषाली जोशी बिनविरोध निवडून आले. तसेच प्रभाग २८ मधून हर्षल मोरे निवडून आले. जळगाव महापालिकेतील प्रभाग १८ मधून गौरव सोनवणे, प्रभाग ९ मधून मनोज चौधरी आणि प्रतिभा देशमुख हे शिवसेनेचे नगरसेवक बिनविरोध निवडून आल्याची माहिती त्यांनी दिली.