घाटकोपर स्थानक परिसरात फेरीवाल्यांचे पुन्हा बस्तान
पालिकेची कारवाई थंडावली का?
घाटकोपर, ता. ३ (बातमीदार) : घाटकोपर रेल्वेस्थानक परिसरात पुन्हा एकदा अनधिकृत फेरीवाल्यांनी बस्तान मांडल्याचे चित्र दिसून येत आहे. काही दिवसांपूर्वी महापालिकेतर्फे करण्यात आलेल्या कारवाईनंतर परिसर काही काळ मोकळा झाला होता. मात्र ही कारवाई अल्पकाळापुरतीच ठरली असून, फेरीवाले पुन्हा पूर्ववत ठिकाणी परतल्याने नागरिकांमधून तीव्र नाराजी व्यक्त होत आहे.
कारवाई झाली की काही दिवस सर्व काही सुरळीत असते, मात्र लगेच पुन्हा तेच चित्र दिसते. यासंदर्भात न्यायालयात अनेक याचिका दाखल आहेत. पालिकेने यावर ठोस निर्णय घ्यायला हवा, अशी प्रतिक्रिया माहिती अधिकार कार्यकर्ते मनोहर जरियाल यांनी व्यक्त केली.
पालिकेची कारवाई थंडावली आहे का, असा सवाल आता उपस्थित होत असून, प्रशासनाने कायमस्वरूपी उपाययोजना कराव्यात, अशी मागणी नागरिकांकडून होत आहे. घाटकोपर स्थानक परिसरातील अतिक्रमणाचा प्रश्न अधिक गंभीर होण्याची शक्यता नाकारता येत नाही.
फेरीवाल्यांवर पालिकेची कारवाई होताना दिसते, मात्र दुसऱ्याच दिवशी तेच फेरीवाले पुन्हा आपले बस्तान मांडतात. कारवाईचा कुठलाच धाक दिसत नाही. फेरीवाल्यांबाबत पालिकेने कडक पावले उचलणे गरजेचे आहे, अशी प्रतिक्रिया सामाजिक कार्यकर्ते योगेश मौर्य यांनी दिली.
फेरीवाल्यांबाबत अनेक याचिका न्यायालयात दाखल आहेत. पालिका कारवाई करते, पण ‘ये रे माझ्या मागल्या’ अशीच परिस्थिती पुन्हा दिसते. जोपर्यंत पालिका ठोस निर्णय घेत नाही तोपर्यंत स्टेशन परिसरातील परिस्थिती जैसे थे राहणार, अशी प्रतिक्रिया माहिती अधिकार कार्यकर्ते मनोहर जरियाल यांनी दिली.

वाहतुकीवर परिणाम
स्थानक परिसर, पादचारी मार्ग तसेच रस्त्याच्या कडेला मोठ्या प्रमाणात अतिक्रमण झाल्यामुळे प्रवाशांना चालणेही कठीण झाले आहे. विशेषतः सकाळी व सायंकाळच्या गर्दीच्या वेळी प्रवाशांना मोठ्या अडचणींचा सामना करावा लागत आहे. याचा वाहतुकीवरही विपरीत परिणाम होत असून, अपघाताचा धोका वाढला आहे.
महापालिकेच्या अतिक्रमण नियंत्रण विभागाकडून अधूनमधून कारवाई केली जात असली, तरी ती सातत्यपूर्ण नसल्याने फेरीवाल्यांचे मनोबल वाढल्याचे बोलले जात आहे.