शासकीय पूजेने म्हसा यात्रेचा शंखनाद
टोकावडे, ता. ३ (बातमीदार) : पौष पौर्णिमेच्या मुहूर्तावर मुरबाड तालुक्यातील प्रसिद्ध श्री खांबलिंगेश्वर देवस्थान येथे शनिवारी (ता. ३) पहाटे शासकीय पूजा झाली. मुरबाडचे तहसीलदार अभिजित देशमुख यांनी सपत्निक ही पूजा केली. यासोबतच ऐतिहासिक म्हसा यात्रेला सुरुवात झाली. ग्रामीण संस्कृती आणि लोकपरंपरेचा वारसा जपणारी ही यात्रा ठाणे जिल्ह्यातील सर्वात मोठी मानली जाते. शनिवारपासूनच मंदिर परिसरात भाविकांनी दर्शनासाठी लांबच लांब रांगा लावल्या होत्या. प्रसिद्ध घोंगडी बाजार, मिठाई गल्ली आणि मुख्य चौक परिसरात मोठी वर्दळ पाहायला मिळाली.

कोट्यवधींची उलाढाल होणाऱ्या या यात्रेसाठी प्रशासन आणि देवस्थान समितीने चोख व्यवस्था केली आहे. शुद्ध पिण्याचे पाणी, फिरती प्रसाधनगृहे आणि अखंड वीजपुरवठा ठेवण्यात येणार आहे. संपूर्ण यात्रा परिसर सीसीटीव्हीच्या निगराणीखाली असून, मोक्याच्या ठिकाणी कडक पोलिस बंदोबस्त तैनात आहे. दररोज औषध फवारणी आणि कचरा व्यवस्थापनासाठी घंटागाड्यांची व्यवस्था करण्यात आली आहे. रविवार सुट्टीचा दिवस असल्याने भाविकांची संख्या लक्षणीय वाढण्याची शक्यता आहे. या पार्श्वभूमीवर वाहतूक कोंडी टाळण्यासाठी विशेष पार्किंग झोन तयार करण्यात आले आहेत.

यात्रेची खास वैशिष्ट्ये
घोंगडी बाजार : राज्यभरातून येणारे दर्जेदार घोंगड्यांचे विक्रेते
कृषी प्रदर्शन : स्थानिक शेती अवजारे आणि ग्रामीण वस्तूंची मोठी बाजारपेठ
ऐतिहासिक महत्त्व : खांबलिंगेश्वर देवाच्या दर्शनासाठी राज्यातील कानाकोपऱ्यातून भाविकांची उपस्थिती

भाविकांनी यात्रेचे पावित्र्य जपून प्रशासनास सहकार्य करावे. शांतता आणि सुरक्षिततेचे नियम पाळून उत्सवाचा आनंद घ्यावा.
- अभिजित देशमुख, तहसीलदार, मुरबाड